Rashid Taraz
zindagi thi ye tamasha to nahin tha pahle
aadmi itna bhi tanha to nahin tha pahle
har taraf sham-e-mohabbat ke ujale the yahan
suraten thiin ye andhera to nahin tha pahle
daav par jazba-e-ulfat ko laga dete the log
phir bhi dil itna shikasta to nahin tha pahle
dekh lete the isi ruuh ke andar ḳhud ko
a.ina ham pe adhura to nahin tha pahle
kabhi jal jaate the rahon men lahu ke bhi charagh
raushni par koi pahra to nahin tha pahle
Leave a Reply