firaq-gorakhpuri

Raat Bhi Nind Bhi Kahani Bhi

raat bhi niind bhi kahani bhi

haae kya chiiz hai javani bhi

ek paigham-e-zindagani bhi

ashiqi marg-e-na-gahani bhi

is ada ka tiri javab nahin

mehrbani bhi sargirani bhi

dil ko apne bhi gham the duniya men

kuchh balaen thiin asmani bhi

mansab-e-dil khushi lutana hai

gham-e-pinhan ki pasbani bhi

dil ko shoalon se karti hai sairab

zindagi aag bhi hai paani bhi

shad-kamon ko ye nahin taufiq

dil-e-gham-ghin ki shadmani bhi

laakh husn-e-yaqin se badh kar hai

un nigahon ki bad-gumani bhi

tangna-e-dil-e-malul men hai

bahr-e-hasti ki be-karani bhi

ishq-e-nakam ki hai parchhain

shadmani bhi kamrani bhi

dekh dil ke nigar-khane men

zakhm-e-pinhan ki hai nishani bhi

khalq kya kya mujhe nahin kahti

kuchh sunun main tiri zabani bhi

aae tarikh-e-ishq men sau baar

maut ke daur-e-darmiyani bhi

apni maasumiyat ke parde men

ho gai vo nazar siyani bhi

din ko suraj-mukhi hai vo nau-gul

raat ko hai vo rat-rani bhi

dil-e-bad-nam tere baare men

log kahte hain ik kahani bhi

vaza karte koi nai duniya

ki ye duniya hui purani bhi

dil ko adab-e-bandagi bhi na aae

kar gae log hukmarani bhi

jaur-e-kam-kam ka shukriya bas hai

aap ki itni mehrbani bhi

dil men ik huuk bhi uthi ai dost

yaad aai tiri javani bhi

sar se pa tak supurdagi ki ada

ek andaz-e-turkamani bhi

paas rahna kisi ka raat ki raat

mehmani bhi mezbani bhi

ho na aks-e-jabin-e-naz ki hai

dil men ik nur-e-kahkashani bhi

zindagi ain did-e-yar ‘firaq’

zindagi hijr ki kahani bhi

More Poems

Leave a Comment