Sarmad Sahbai
dam junun ki had-e-intiha pe Thahra hai
ye mera dil hai abhi ibtida pe Thahra hai
usi ke lams se ab-o-hava badalti hai
tamam manzar-e-jan ik ada pe Thahra hai
kanar-e-kun se pare hai kahin vajud apna
ye karvan to ghubar-e-sada pe Thahra hai
kuchh aur der numa.ish hai shor-o-shar ki yahan
ye ik habab hai mauj-e-fana pe Thahra hai
shua-e-sub.h bun-e-gosh men utarti hai
zaval-e-mehr ki dast-e-hina pe Thahra hai
shab-e-siyah sar-e-ḳhal men simaTti hai
sitara TuuT ke band-e-qaba pe Thahra hai
nafas nafas men bhaḌakti hai dil ki lau ‘sarmad’
ajab charagh hai ye bam-e-hu pe Thahra hai
Leave a Reply