Deta Tha Jo Saya Wo Shajar Kat Raha Hai

deta tha jo saaya vo shajar kaat raha hai

khud apne tahaffuz ki vo jad kaat raha hai

be-samt udanon se pashiman parinda

ab apni hi minqar se par kaat raha hai

mahbus huun gharon men magar azar-e-takhil

chattanon men ashkal-e-hunar kaat raha hai

ik zarb-e-musalsal hai ki rukti hi nahin hai

har tar-e-nafas dard-e-jigar kaat raha hai

hai kaun kamin-gah men ye kaise bataun

har tiir magar mere hi par kaat raha hai

ummid ujale ka liye tesha har ik dil

har raat ba-andaz-e-sahar kaat raha hai

karta hai fuzun vahshat-e-dil dasht ka mausam

‘bilqis’ magar kya karun ghar kaat raha hai

Leave a Comment