kya sochte rahte ho tasvir bana kar ke
kyuun us se nahin kahte kuchh honT hila kar ke
ghar us ne banaya tha ik sabr o raza kar ke
miTTi men mila Daala ehsan jata kar ke
jo jaan se pyare the naam un ne hi puchha hai
hairan hua main to is shahr men aa kar ke
tah.zib-e-musalla se vaqif hi na tha kuchh bhi
aur baiTh gaya dekho sajjade pe aa kar ke
muddat se pata us ka malum nahin kuchh bhi
mash.hur bahut tha jo ashufta-nava kar ke
Leave a Reply