Hina Ambareen Tariq
kuchh to hamare darmiyan hai dil-lagi abhi
teri nigah-e-naz men hai tishnagi abhi
ḳhamoshiyan ajiib hain is sard shahr ki
barfili is hava men hai divangi abhi
saughat mil rahi hai tiri yaad ki mujhe
is hijr ne sikha.i bahut sha.iri abhi
vo biit hi ga.i jo amavas ki raat thi
phaili hai mere charon taraf chandni abhi
jaane vo kaun log the jo kar ga.e vafa
tum se to ho saki na zara dilbari abhi
ab bhi ‘hina’ sahega na-jane vo kitne gham
qismat men us ki hai likhi ye be-ghari abhi
Leave a Reply