dast-e-qatil men ye shamshir kahan se aai
naaz karti miri taqdir kahan se aai
chandni siine men utri hi chali jaati hai
chand men aap ki tasvir kahan se aai
apni palkon pe saja laai hai kis ke jalve
zindagi tujh men ye tanvir kahan se aai
ho na ho us men chaman valon ki sazish hai koi
phuul ke haath men shamshir kahan se aai
khvab to khair ham us bazm se le aae the
lekin is khvab ki tabir kahan se aai
khun-e-hasrat hai kahan aur ye ezaaz kahan
ai hina tujh men ye tauqir kahan se aai
dil se ik aah to nikli hai shakila baano
lekin is aah men tasir kahan se aai
Leave a Reply