Shohrat Bukhari
dil us se laga jis se ruTha bhi nahin jaata
kaam us se paḌa jis ko chhoḌa bhi nahin jaata
din raat taḌapta huun ab jis ki juda.i men
vo samne aa.e to dekha bhi nahin jaata
manzil pe pahunchne ki ummid bandhe kaise
paanv bhi nahin uThte rasta bhi nahin jaata
ye kaun si basti hai ye kaun sa mausam hai
socha bhi nahin jaata bola bhi nahin jaata
angaron ki manzil men zanjir-bapa hain ham
Thahra bhi nahin jaata bhaga bhi nahin jaata
is martaba chha.i hai kuchh aisi ghaTa jis se
khulna bhi nahin hota barsa bhi nahin jaata
har haal men itne bhi be-bas na hue the ham
daldal bhi nahin lekin nikla bhi nahin jaata
mar jaate the ghairon ke kanTa bhi jo chubhta tha
ḳhud qatl hue lekin roya bhi nahin jaata
kafir hon jo hasrat ho jiine ki magar ‘shohrat’
is haal men yaron ko chhoḌa bhi nahin jaata
Leave a Reply