apne chehre par ka.i chehre liye
ham baḌe hi parsa ban kar jiye
raaz ulfat ka chhupane ke liye
zabt-e-girya bhi kiya lab bhi siye
jin men chalti hain hava.en tez tez
aisi rahon men jala.e hain diye
jo bhi hain is bazm men mad.hosh hain
aur ye mad.hoshiyan hain bin piye
aap ne chhoḌe hain jo naqsh-e-qadam
vo hamare haq men hain raushan diye
gham ke tufanon ki zad par be-ḳhatar
phir ‘jamali’ ne jala.e hain diye
Leave a Reply