Charaghon Ke Bujhane Ko Hawa Be-iKHtiyar Aai

Jazib Quraishi

charaghon ke bujhane ko hava be-iḳhtiyar aa.i

gulabon ki mahak bikhri to avaz-e-sharar aa.i

bagulon ne safar men andhiyon ka asman dekha

magar ik faḳhta apne shajar tak be-ghubar aa.i

jise tu ne ujala jaan kar chehre pe likkha tha

vahi shohrat tiri rusva.iyon ke ham-kanar aa.i

andheron men mujhe ḳhud ik sitara DhunDne aaya

ki shahr be-hunar se ik sada-e-e’tibar aa.i

miri ankhon men jitne rang the sab jal ga.e ‘jazib’

magar vo mujh se milne jab bhi aa.i be-qarar aa.i