Apne Hisse Ki Ana Dun to Ana Dun Kis Ko

apne hisse kī anā duuñ to anā duuñ kis ko

apnī nazroñ se girā duuñ to girā duuñ kis ko

zindagī kā ye mirī kaun hai qātil jaane

maiñ huuñ mushkil meñ sazā duuñ to sazā duuñ kis ko

dostī meñ bhī hai ranjish kī kahānī ki mirī

is kahānī ko batā duuñ to batā duuñ kis ko

muddatoñ se haiñ milī Thokareñ mujh ko jo yahāñ

ishq-bāzī meñ vafā duuñ to vafā duuñ kis ko

vaar sab piiTh pe karte haiñ yuuñ dil meñ rah kar

tū batā de maiñ duā duuñ to duā duuñ kis ko

baat kartī hī nahīñ ab to ye tanhā.ī bhī

man kī har baat sunā duuñ to sunā duuñ kis ko

har koī juujh rahā hai yahāñ apne ġham se

dard-e-ġham kī ye davā duuñ to davā duuñ kis ko

kaun lā.egā mirī chiTThiyāñ ḳhushiyoñ vaalī

apne ghar kā maiñ pata duuñ to pata duuñ kis ko

ġham meñ Duubā huā rahtā huuñ maiñ ab har lamha

‘mīt’ ye jaam pilā duuñ to pilā duuñ kis ko

Leave a Comment