ahmad-mahfuz

Badan-Sarab Na Dariya-e-Jaan Se Milta Hai

badan-sarab na dariya-e-jan se milta hai

to phir ye khvab-kinara kahan se milta hai

ye dhuup chhanv salamat rahe ki tera suragh

hamen to saya-e-abr-e-ravan se milta hai

ham ahl-e-dard jahan bhi hain silsila sab ka

tumhare shahr ke ashuftagan se milta hai

jahan se kuchh na mile to bhi faede hain bahut

hamen ye naqd usi astan se milta hai

faza hi saari hui surkh-ru to hairat kya

ki aaj rang-e-hava gul-rukhan se milta hai

bichhad ke khaak hue ham to kya zara dekho

ghubar ja ke usi karvan se milta hai

More Poems

Leave a Comment