Muntazim

hamare jaise ajiib logon ki ranjishon ka

malal kis ko

zamin karti hai bain

aansu falak bahata hai chupke chupke

faza men siski si tairti hai

hain sar-ba-zanun tamam manzar

kahin chhini hai kisi ki gudiya

kahin phati hain nai kitaben

kisi ki shah-rag pe koi jhapta

kisi ki galiyon men khuun bikhra

suna hai ham ne

ki is shujaat pe tamgha milega us ko

badi nafasat se us ne chhante hain apne revad

maveshi saare bate hue hain

ye rang o zaat o nasl un ke bane tavile

sab apni khushiyon ghamon ko bantenge apni had men

ki bhed bakri se mil na paae

na gaae bhenson men hon kulelen

suna hai us ke nizam-e-mulki pe sab hain nazan

use hi bakhshenge phir se vo mansab-e-hazari

hamare jaise ajiib logon ki ankhon men

kyuun hai itna paani

Leave a Comment