Dr Naresh
zikr-e-mazi se shab-o-roz satate hain mujhe
mere ahbab hi divana banate hain mujhe
main to ik jumla-e-ba-ma.ani-o-ba-matlab huun
aur vo harf-e-ghalat kah ke miTate hain mujhe
ek be-rabt ta.alluq ka sahara le kar
log kya ishq ke andaz sikhate hain mujhe
jo the apne hi ḳhad-o-ḳhal se ghafil kal tak
aaj vo log bhi a.ina dikhate hain mujhe
kuchh tabi.at hi baghavat ki taraf maa.il hai
varna maiḳhane ke adab to aate hain mujhe
kuchh ta.alluq koi nisbat nahin lekin phir bhi
ai ‘naresh’ aaj suna hai ki banate hain mujhe
Leave a Reply