aḳhir ḳhud apne hi lahu men Duub ke sarf-e-vigha hoge
qadam qadam par jang laḌi hai kahan kahan barpa hoge
haal ka lamha patthar Thahra yuun bhi kahan guzarta hai
haath mila kar jaane vaalo dil se kahan juda hoge
maujon par lahrate tinko chalo na yuun itra ke chalo
aur zara ye dariya utra tum bhi lab-e-dariya hoge
socho khoj mila hai kis ko raah badalte taron ka
is vahshat men chalte chalte aap sitara sa hoge
siine par jab harf-e-tamanna dard ki surat utrega
ḳhudi aankh se Tapkoge aur ḳhud hi dast-e-dua hoge
sukhe peḌon ki sab lashen gharq kaf-e-sailab men hain
qaht-e-ab se marte logo bolo ab kya chahoge
baat ye hai is baagh men phuul se patta hona achchha hai
rang aur ḳhushbu banToge to pahle rizq-e-hava hoge
ai mere na-gufta shero ye to batao mere ba.ad
kaun se dil men qarar karoge kis ke lab se ada hoge
Leave a Reply