mizaj-e-shahr jo tahrir karne nikle hain
ham apne aap ko dil-gir karne nikle hain
nikal ke ḳhvab-sara se bujha ke chashm-e-guman
ḳhayal-o-ḳhvab ko ta.abir karne nikle hain
saja ke aankh men vahshat badan pe virani
tire jamal ki tash.hir karne nikle hain
jo din ki bhiiḌ men ham se bichhaḌ ga.i thi kahin
us ek shaam ko tasvir karne nikle hain
bahut hi saada hain ham bhi uTha ke yaad koi
ga.e dinon ko jo zanjir karne nikle hain
libas-e-ishq saja kar badan pe ham ‘ḳhavar’
tilism-e-husn ko tasḳhir karne nikle hain
Leave a Reply