abu-bakr-abbad

Ek Adhuri Dastan

vo ik ladki

jo khamoshi men bhi aksar chahakti thi

sub.h se shaam tak aur raat men bhi baten karti thi

sabhon ko shaad rakhti thi bahut masrur rahti thi

kabhi badal kabhi khushbu kabhi gul-rang ki surat

barasti thi bikharti thi badalti thi

magar mahsus hota tha hamesha paas rahti hai

jo vo anjan banti thi

aziiz az jaan lagti thi

kabhi chanchal hava panchhi ke pankhon aur nadi ke lams ki manind

utar aati thi dil men ruuh ko pur-kaif rakhti thi

kabhi honton ke ras ankhon ki shabnam galon ke khush-rang mausam se

nashe ko jhiil ko gulbun ko bhi vo maat deti thi

main us ke lams se rukhsaron ki dhimi tamazat garm sanson se

bahut qurbat bahut apnaiyat mahsus karta tha

zehn ke paas paata tha use apna samajhta tha

magar phir kya hua ik din ki ik bad-bakht Daain ne

khuda jaane kahan bheja ki sab la-ilm hain us se

magar pahunche hue darvesh ne ye bhed khola hai

basera us ka ab hai chandni ke kunj

sitaron ke baghichon men

vo un ki sair karti hai magar ghamgin rahti hai

use sab vahm kahte hain khilaf-e-aql kahte hain

magar pakka yaqin hai jab koi tuuta hua taara

zamin ko chumne aaega vo bhi saath aaegi

phir apne saath vo khushiyon ke sad.ha gul bhi laegi

so har shab jagta huun

raah men akash ki ankhen bichhata huun

magar jo taara aata hai zamin tak aa nahin paata

More Poems

Leave a Comment