dil men tire ai nigar kya hai
hota nahin ham-kanar kya hai
aaya jo dam vo hai ghanimat
is ziist ka e’tibar kya hai
hain seb se bhi vo chhatiyan sakht
aage un ke anaar kya hai
duniya ke ye sab dhakosle hain
turbat kaisi mazar kya hai
taus se chhed-chhad kaisi
haan ai dil-e-dagh-dar kya hai
jo jo vo ranj den uthao
jab dil hi diya to aar kya hai
main chahta huun use na chahun
dil par mira ikhtiyar kya hai
mizhgan ka hai mire dil men khatka
ai khushbu-e-nok-e-khar kya hai
mitti miri khaak men milai
mujh se un ko ghubar kya hai
daudun to mujhe saba na paae
paidal kaisa savar kya hai
bose ki talab ki vasl ka zikr
farmaiye nagavar kya hai
hai kya ‘agha’ tadap raha hai
kyuun kahte ho baar baar kya hai
Leave a Reply