Mujhko Yaqin Hai Sach Kahti Thin Jo Bhi Ammi Kahti Thin

Javed Akhtar

mujh ko yaqin hai sach kahti thiin jo bhi ammi kahti thiin

jab mere bachpan ke din the chand men pariyan rahti thiin

ek ye din jab apnon ne bhi ham se naata toḌ liya

ek vo din jab peḌ ki shaḳhen bojh hamara sahti thiin

ek ye din jab saari saḌken ruThi ruThi lagti hain

ek vo din jab aao khelen saari galiyan kahti thiin

ek ye din jab jaagi raten divaron ko takti hain

ek vo din jab shamon ki bhi palken bojhal rahti thiin

ek ye din jab zehn men saari ayyari ki baten hain

ek vo din jab dil men bholi-bhali baten rahti thiin

ek ye din jab lakhon gham aur kaal paḌa hai aansu ka

ek vo din jab ek zara si baat pe nadiyan bahti thiin

ek ye ghar jis ghar men mera saz-o-saman rahta hai

ek vo ghar jis ghar men meri buḌhi naani rahti thiin