mera maslak hai mohabbat dosti sheva mira
meri manzil bhi yahi hai aur yahi rasta mira
kyuun kisi se kuchh bayan karta bhi main rudad-e-gham
hal-e-dil ka aa.ina bhi mera hai chehra mira
apni vaz.a-dari ne hone diya rusva nahin
go raha mahrumiyon se umr-bhar rishta mira
abla-pa.i se kab sahra-navardi ruk saki
ik rafiq-e-rah ki surat hai zaḳhm-e-pa mira
doston ko ho mubarak bhi faza-e-gulistan
raah kab se dekhta hai daman-e-sahra mira
vaz.a-dari doston se ho saki itni nahin
dushmanon men rat-din to hota hai charcha mira
aap hi ne to mohabbat se kaha tha ek din
ashiq-e-jan-baz hai ‘ḳhushtar’ faqat tanha mira
Leave a Reply