main ne kab apni vafaon ka sila manga tha
ik tabassum hi tira bahr-e-ḳhuda manga tha
kya ḳhabar thi ki miri niind hi ujaḌ ja.engi
main ne kho.e hue ḳhvabon ka pata manga tha
dast-e-gul-chin ne bhi gulshan se vahi phuul chuna
main ne jis gul ke liye dast-e-saba manga tha
shiddat-e-gham men dua ki thi tujhe bhulne ki
ab bhare zaḳhm to nadim huun ye kya manga tha
bas isi baat pe barham hai zamana mujh se
apne bad-ḳhvahon ka bhi main ne bhala manga tha
ik guzarish bhi na ho paa.i qubul us ke huzur
ghaliban main ne hi kuchh had se siva manga tha
chuḌiyan TuTin to zaḳhmon se lahu rang hui
jis hatheli ne zara rang-e-hina manga tha
tu ne har gham se navaza hai tira ḳhaas karam
mujh ko to ye bhi nahin yaad ki kya manga tha
afaten sahne ka yaara bhi to deta yaar ab
aur to kuchh bhi nahin us ke siva manga tha
ye alag baat mila karb-e-musalsal varna
ham ne jo manga vo ba-sidq-o-safa manga tha
zehn par ‘chand’ phir ik barq si lahrane lagi
dil ne maazi ke nihan-ḳhanon se kya manga tha
Leave a Reply