tufan se bach ke daman-e-sahil men rah gaya
mushkil ke ba.ad aur bhi mushkil men rah gaya
ik shor tha jo gosha-e-mahfil men rah gaya
ik dard tha jo dil se uTha dil men rah gaya
ab vo nigah-e-naz hui ma.il-e-karam
jab koi mudda.a na mire dil men rah gaya
manzil mire qarib se ho kar guzar ga.i
aur main talash-e-jada-e-manzil men rah gaya
manzil fana-e-zauq-e-talab ka maqam thi
achchha hua main sarhad-e-manzil men rah gaya
allah-re jazb-e-ishq ki husn-e-nigah-e-qais
ik naqsh ban ke parda-e-mahmil men rah gaya
naala to ḳhair nang-e-gham-e-ishq tha magar
naghma bhi soz-o-saz ki mahfil men rah gaya
saare hijab-e-husn nigahon se haT ga.e
ik aa.ina zarur muqabil men rah gaya
mujh se ye puchhti hain miri hichkiyan ‘figar’
ab kitna fasla tiri manzil men rah gaya
Leave a Reply