Khalid Mubashshir
sab log shaam hote hi jab apne ghar ga.e
sahra ko ham bhi shahr se phir lauT kar ga.e
achchhe dinon ki aas men jaane kidhar ga.e
jitne the mere ḳhvab suhane bikhar ga.e
muusa jo ban chale the avami ḳhitab men
sahir ki rassiyon se vahi log Dar ga.e
gahra.i napne men the kuchh log munhamik
kuchh log paniyon men bila ḳhauf utar ga.e
ahl-e-junun ki jab na rahi chak-damani
shahan-e-ḳhush-libas se rishte sanvar ga.e
aisa mujassama tha vo ḳhush-pairahan ki bas
nange gharib bachche vahin par Thahar ga.e
ai ḳhak-e-hind bol ki tu janti hai sab
kuchh to bata kahan mire la.al-o-gohar ga.e
kahte hain un se pahle ye gulshan tha ḳhar-zar
vo kaun log the jo yahan se guzar ga.e
jis ke liye ḳhirad ko thi sardar ki talash
ahl-e-junun vo kaam sar-e-dar kar ga.e
ḳhud apne ehtisab ki fursat kahan mili
kuchh bhi hua to ghairon pe ilzam dhar ga.e
lashkar ko jaan de ke mila bhi to kya mila
fat.h-o-zafar ke taaj to shahon ke sar ga.e
main ne kaha mutalba koi nahin mira
kahne lage ki aap to bilkul sudhar ga.e
Leave a Reply