Bhala Hoga Kuchh Ek Ahwal Us Se Ya Bura Hoga

bhala hoga kuchh ik ahval us se ya bura hoga

maaal apna tire gham men khuda jaane ki kya hoga

tafahhus faeda naseh tadaruk tujh se kya hoga

vahi pavega mera dard-e-dil jis ka laga hoga

kaso ko shauq yarab besh us se aur kya hoga

qalam haath aa gai hogi to sau sau khat likha hoga

dukanen husn ki aage tire takhta hui hongi

jo tu bazar men hoga to yusuf kab bika hoga

maishat ham faqiron ki si ikhvan-e-zaman se kar

koi gaali bhi de to kah bhala bhaai bhala hoga

khayal us bevafa ka ham-nashin itna nahin achchha

guman rakhte the ham bhi ye ki ham se ashna hoga

qayamat kar ke ab taabir jis ko karti hai khilqat

vo us kuche men ik ashob sa shayad hua hoga

ajab kya hai halak ishq men farhad-o-majnun ke

mohabbat rog hai koi ki kam us se jiya hoga

na ho kyuun ghairat-e-gul-zar vo kucha khuda jaane

lahu is khaak par kin kin azizon ka gira hoga

bahut ham-sae is gulshan ke zanjiri raha huun main

kabhu tum ne bhi mera shor nalon ka suna hoga

nahin juz arsh jaaga raah men lene ko dam us ke

qafas se tan ke murgh-e-ruh mera jab raha hoga

kahin hain ‘mir’ ko maara gaya shab us ke kuche men

kahin vahshat men shayad baithe baithe uth gaya hoga

Leave a Comment