juda hai dard ka mafhum lafz-e-ḳhvab ke saath
shu.ur-e-zat nikharta hai inqalab ke saath
nazar uTha ke to dekho ufuq ke chehre par
miri ghazal ka taqaddus hai aftab ke saath
azal se dasht-o-bayaban men ghumti hai hayat
kabhi naqab se haT kar kabhi naqab ke saath
shafaq hai ya tiri ankhon ki mauj-e-be-ḳhvabi
jo ghul rahi hai har ik qatra-e-sharab ke saath
guzar di hain ka.i intizar ki shamen
kuchh iztirab ki ḳhatir kuchh iztirab ke saath
mire vajud ki tanha.iyon ke ziine se
utar raha hai sambhal kar koi hijab ke saath
rivayaton ke davavin dekhne vaalo
na.e mizaj ka chehra paḌho kitab ke saath
Leave a Reply