Saleem Shahid
ab shahr ki aur dasht ki hai ek kahani
har shaḳhs hai pyasa ki mayassar nahin paani
main toḌ bhi sakta huun rivayat ki zanjir
main dahr ke har ek tamaddun ka huun baani
main ne tiri tasvir ko kya rang diye hain
andaz badal deta hai lafzon ke ma.ani
ab bhi hai havaon men ga.e vaqt ki avaz
mahfuz hai sinon men har ik yaad purani
main sab se alahada huun magar mujh men hai sab kuchh
Thahra hua sahra ho ki dariya ki ravani
ik umr se in ankhon ne badal nahin dekhe
dekhi na suni thi kabhi aisi bhi girani
Leave a Reply