Ali Manzoor Hyderabadi
jab apne dil pe apna kuchh iḳhtiyar dekha
begana-ḳhu hasin ko begana-var dekha
paiham tajalliyon ki mujh men sakat kahan thi
nazren chura chura kar sue-nigar dekha
aaj apni be-ḳhudi ko irfan ki raushni men
us mah-e-sim-tan ka a.ina-dar dekha
teri inayaton se anjam-bin nazar men
aghaz-e-ishq hi men anjam-e-kar dekha
ye bholi bholi surat ai chand phir bhi tu ne
meri taraf se apne dil men ghubar dekha
husn-e-shabab-parvar kis darje sehar-za hai
dekha tira zamana ai gul-e-ezar dekha
us shoḳh ki gali men manzur-e-tafta-jan ko
phir be-qarar paaya phir ashk-bar dekha
Leave a Reply