Aankhon Ne Bahut Din Se Qayamat Nahin Dekhi

āñkhoñ ne bahut din se qayāmat nahīñ dekhī

muddat huī achchhī koī sūrat nahīñ dekhī

chehroñ kī tarah kis liye murjhā.e hue haiñ

phūloñ ne to ham jaisī musībat nahīñ dekhī

vo shahr se guzrā thā faqat yaad hai utnā

phir koī bhī dastār salāmat nahīñ dekhī

lauTe jo masāfat se to maiñ us se ye pūchhūñ

bastī to koī raah meñ ġhārat nahīñ dekhī

girte hue pattoñ kī sadā.eñ mire dil se

kahtī haiñ ki tū ne koī hijrat nahīñ dekhī

Leave a Comment