Zafar Zaidi
jo tab-e-did mili bhi to kya dikha.i diya
dilon ke biich ajab fasla dikha.i diya
sahar ka nikla hua main jo shaam ko lauTa
to mere ghar men koi dusra dikha.i diya
ḳhala men bas ga.e sab log ek ik kar ke
zamin pe jaane ye kya hadisa dikha.i diya
uḌate jaate ho ḳhud ko ye kis taraf yaaro
safar men kya koi rasta naya dikha.i diya
na raas aaya mujhe meri qurbaton ka safar
mira ḳhayal bhi mujh se juda dikha.i diya
na baaḌh aa.i na tufan hi uThe imsal
samundaron ka bharam TuTta dikha.i diya
tiri nigah ki gahra.iyon men dekha to
mira vajud pighalta hua dikha.i diya
jahan pe saans bhi lena tha ek jurm ‘zafar’
vahan bhi mera lahu bolta dikha.i diya
Leave a Reply