Mahmood Shaam
raat aa.i hai guzar ja.egi
raushni ban ke bikhar ja.egi
haan yunhi chand ko takte rahna
chandni dil men utar ja.egi
lazzat-e-dard bacha kar rakhna
nik.hat-e-jan hai bikhar ja.egi
karb ki aag laga lo dil se
kal ḳhuda jaane kidhar ja.egi
isi raste pe baha apna lahu
isi raste se sahar ja.egi
jism kaTna tha ye ma.alum na tha
yuun miri zaat bikhar ja.egi
main ne ji-bhar ke tujhe dekhna hai
ab tiri shakl nikhar ja.egi
Leave a Reply