Mohammad Shahid Firoz
ḳhvab-gar ḳhvab banata hi chala jaata hai
jis ko jo aa.e samajh us ko uTha laata hai
raat bujhti hai to jaag uThte hain vahshi manzar
din ujaḌta hai to dil ḳhauf pe uksata hai
tu ne jalte hue manzar ko hava kyuun di thi
raakh ab uḌne lagi hai tu kidhar jaata hai
ye tire soche hue rang ka muhtaj nahin
husn to husn hai har rang men itrata hai
dekhne vaale mohabbat ki nazar se dekhen
main vo manzar huun jise husn-e-nazar bhata hai
ai moallim ki tarah ishq paḌhane vaale
ishq lecture se nahin kar ke samajh aata hai
ek mushtaq-nigahi ki talab men ‘shahid’
jis ko dekho vahi tasvir hua jaata hai
Leave a Reply