Pirzada Qasim
us ki ḳhvahish hai yahi harf-e-vazahat ke baghair
ab koi ḳhvab bhi dekhe na ijazat ke baghair
ham ko DhunDo to hamen khone ki ḳhatir DhunDo
ḳhvab ta.abir nahin hote hain hasrat ke baghair
dil ko ik kar-e-musalsal ne rakha hai abad
ek lamha bhi nahin guzra mohabbat ke baghair
yuun bhi dushvar hai asuda-e-sahra hona
aur jab ḳhaak bhi ho jaana ho vahshat ke baghair
vaqt saffak hai itna kabhi socha bhi na tha
ham use yaad na kar pa.enge zahmat ke baghair
ham tire qarya-e-jan-tab men itna Thahre
ya.ani ik lamha guzar aa.e hain ujlat ke baghair
ab to ham ḳhud se bhi kam-kam hi mila karte hain
kisi ḳhvahish se alag aur zarurat ke baghair
Leave a Reply