akbar-allahabadi

Har Qadam Kahta Hai Tu Aaya Hai Jaane Ke Liye

har qadam kahta hai tu aaya hai jaane ke liye

manzil-e-hasti nahin hai dil lagane ke liye

kya mujhe khush aae ye hairat-sara-e-be-sabat

hosh udne ke liye hai jaan jaane ke liye

dil ne dekha hai bisat-e-quvvat-e-idrak ko

kya badhe is bazm men ankhen uthane ke liye

khuub ummiden bandhin lekin huiin hirman nasib

badliyan utthin magar bijli girane ke liye

saans ki tarkib par mitti ko pyaar aa hi gaya

khud hui qaid us ko siine se lagane ke liye

jab kaha main ne bhula do ghair ko hans kar kaha

yaad phir mujh ko dilana bhuul jaane ke liye

dida-bazi vo kahan ankhen raha karti hain band

jaan hi baaqi nahin ab dil lagane ke liye

mujh ko khush aai hai masti shekh ji ko farbahi

main huun piine ke liye aur vo hain khane ke liye

allah allah ke siva akhir raha kuchh bhi na yaad

jo kiya tha yaad sab tha bhuul jaane ke liye

sur kahan ke saaz kaisa kaisi bazm-e-samain

josh-e-dil kaafi hai ‘akbar’ taan udane ke liye

More Poems

Leave a Comment