khinch kar yuun le chali vahshat bayaban ki taraf
laaen jaise tifl-e-bad-khu ko dabistan ki taraf
faiz vahshat ka ada-e-shukr jab vajib hua
sar jhukaya ham ne mehrab-e-gareban ki taraf
hasil-e-josh-e-junun hai matam-e-hosh-o-khirad
khaak udate jaate hain vahshi bayaban ki taraf
aql ke tegh-e-junun-e-tez se kuche kate
kaun aae jada-e-chak-e-gareban ki taraf
kar chuka josh-e-junun jins-e-khirad par haath saaf
laut ab aati hai bazar-e-gareban ki taraf
ishq ke maktab men jab aaya paye dars-e-junun
pahle hi ungli uthi nun-e-gareban ki taraf
mail-e-zevar hua jab vo hasin-e-jama-zeb
chand aaya charkh se tauq-e-gareban ki taraf
hosh men aate hain divane gai fasl-e-bahar
dasht-e-vahshat chhup rahe pusht-e-gareban ki taraf
nakhun-e-gham ka nishan dil par hai misl-e-mah-e-nau
ungliyan uthti hain us zakhm-e-numayan ki taraf
jab kisi ashiq ne kuchh hal-e-pareshani kaha
hans diye munh pher kar zulf-e-pareshan ki taraf
zoaf men ji khol kar rone ki hasrat hai mujhe
dekhta hai yaas se har ashk daman ki taraf
shama ke shoale sitam karte hain misl-e-barq-e-tur
dekhta huun jab ‘nazar’ bazm-e-hasinan ki taraf