Jawed Manzar
jab vo yusuf hi na ho misr ke bazar ke paas
phir bhala kaun sa jazba ho ḳharidar ke paas
pahle har shaḳhs tha iḳhlas-o-vafa ka paikar
ab ye daulat bhi kahan milti hai do-char ke paas
ham-safar mere aqidat se qadam chhune lage
mujh ko dekha jo kabhi jubba-o-dastar ke paas
ab to apnon men muravvat ki hai daulat mafqud
ye ḳhazina bhi hamen milta hai aghyar ke paas
husn hi husn hai mahfil men tumhari lekin
tab-e-didar nahin talib-e-didar ke paas
muflisi apnon ko begana bana deti hai
koi aata nahin girti hui divar ke paas
muskurata hai gham-e-zist men ‘manzar’ aise
phuul jis tarah gulistan men khile ḳhaar ke paas
Leave a Reply