tevar bhed batate hain ye nam-alud havaon ke
aaj zara khul khelne vaale hain andaz ghaTaon ke
kamra band kiya aur saare zabt ke bandhan TuuT ga.e
ankhen Dhili chhoḌin raste khol diye dariyaon ke
dogana azar hai sahab ham jaison ki qismat men
ham muhtaj ravayyon ke aur ham majbur anaon ke
dekh le kitne kashT uTha kar tere dar tak pahuncha huun
dekh le papḌi honTon ki aur dekh le chhale paanv ke
kha.iyan hain khaDDe roḌe hain kankar patthar hain lekin
jannat ke raste lagte hain saare raste gaanv ke
un ki chaah men qarya qarya basti basti ghuum liye
un ki chaah men kone khudre chhan liye sahraon ke
ham jo bazm-e-ghair men aksar un ki baten karte hain
tapti dhuup men lutf liya karte hain ThanDi chhanv ke
toḌ ke rasm-e-ahd-e-vafa ko aḳhir chhoḌ hi jaana tha
pinjre men aa baiThe the panchhi azad fazaon ke
ham mehrab aur mimbar valon ki ankhon ko chubhte hain
ham ne aql ko rahbar maana ham mafrur ḳhudaon ke
Leave a Reply