yuun kahne ko pairaya-e-izhar bahut hai
ye dil dil-e-nadan sahi khuddar bahut hai
divanon ko ab vusat-e-sahra nahin darkar
vahshat ke liye saya-e-divar bahut hai
bajta hai gali-kuchon men naqqara-e-ilzam
mulzim ki khamoshi ka vafadar bahut hai
jab husn-e-takallum pe kada vaqt pade to
aur kuchh bhi na baaqi ho to takrar bahut hai
khud aina-gar aina chhode to nazar aae
dahka hua har shola-e-rukhsar bahut hai
munsif ke liye izn-e-samaat pe hain pahre
aur adl ki zanjir men jhankar bahut hai
Leave a Reply