kaun guman yaqin bana kaun sa ghaav bhar gaya
jaise sabhi guzar gae ‘jaun’ bhi kal guzar gaya
us ka charagh-e-vasl to hijr se rabte men tha
vo bhi na jal saka udhar ye bhi idhar bikhar gaya
ziist ki raunaqen tamam us ki talash men rahin
aur vo gham-nazhad ‘jaun’ kis ko khabar kidhar gaya
gam-ba-gam ik bahisht aur vo us ki ek hasht
raah men bhi ruka nahin aur na apne ghar gaya
rasm-e-supurdagi ko kab darkhur-e’tina kaha
khud se jo tha gurez-pa sab se gurez kar gaya
us ke sukhan ka moajiza us ki nahin men dekhiye
haan bhi hai majra magar ‘jaun’ kahan udhar gaya
us ko tha sakht ikhtilaf ziist ke matn se so vo
bar-sar-e-hashiya raha aur kamal kar gaya
us ke khayal ki numud ahd-ba-ahd javedan
bas ye kaho ki ‘jaun’ hai ye na kaho ki mar gaya
Leave a Reply