nichi nazron ke vaar aane lage
lo bas ab jan-o-dil thikane lage
meri nazron ne kya kaha yarab
kyuun vo sharma ke muskurane lage
maslahat tark-e-jaur tha chande
phir usi hathkandon pe aane lage
jalva-e-yar ne kiya be-khud
ham to aate hi un ke jaane lage
sab ka kaaba hai manzil-e-maqsud
ham to aage qadam badhane lage
kya kahin amad-e-bahar hui
kyuun gareban pe haath jaane lage
gar haqiqat-nigar ho chashm to vo
jalva har rang men dikhane lage
ham ko rabt-e-guzishta yaad aae
vo jo ban-than ke ghar se jaane lage
bas yahi ghayat-e-tasavvur hai
hijr men lutf-e-vasl aane lage
us sarapa bahar ke jalve
rang kuchh aur hi na khane lage
kyuun ki fursat adu se tum ko mili
jo tasavvur men mere aane lage
be-ghiza ke to rah nahin sakte
na mila kuchh to zahar khane lage
baat banti nazar nahin aati
ab vo baten bahut banane lage
aaj ‘majruh’ zabt kar na saka
kya kare jab ki jaan jaane lage
Leave a Reply