Har-Chand Be-Nawa Hai Kore ghaDe Ka Pani

Aslam Kolsarii

har-chand be-nava hai kore ghaḌe ka paani

divan ‘mir’ ka hai kore ghaḌe ka paani

uplon ki aag ab tak hathon se jhankti hai

ankhon men jagta hai kore ghaḌe ka paani

jab mangte hain saare angur ke sharare

apni yahi sada hai kore ghaḌe ka paani

kaghaz pe kaise Thahren misre miri ghazal ke

lafzon men bah raha hai kore ghaḌe ka paani

ḳhana-ba-dosh chhori takti hai chori chori

us ka to aa.ina hai kore ghaḌe ka paani

chiḌiyon si chahchaha.en panghaT pe jab bhi sakhiyan

chup-chap ro diya hai kore ghaḌe ka paani

us ke lahu men shayad tasir ho vafa ki

jis ne kabhi piya hai kore ghaḌe ka paani

izzat zamir mehnat danish hunar mohabbat

lekin kabhi bika hai kore ghaḌe ka paani

dekhun jo chandni men lagta hai mujh ko ‘aslam’

pighli hui dua hai kore ghaḌe ka paani