Arsh Malsiyani
yaqin-e-mohkam ka hai sahara yahi amal kargar hai pyare
ilaj-e-darj-e-nihan yahi hai isi dava men asar hai pyare
tiri nigahon men hain sama.e jamal-e-hasti jalal-e-ma.ani
na dekh tu aur ki nazar se tiri nazar mo’atabar hai pyare
nahin tiri raah rah-e-mushkil hai rahbar-e-rah ḳhud tira dil
tire qadam men hai teri manzil tavil be-shak safar hai pyare
na hai hasinon men kaj-ada.i na zindagi men koi bura.i
hai nekiyon hi ka ghar ḳhuda.i agar tu ḳhud ḳhud-nigar hai pyare
tire hi dil men hai jalva-farma buton ki surat ḳhuda ka jaadu
yahi hai dair aur yahi hai ka.aba yahi mohabbat ka ghar hai pyare
kahan chhupega vo mah-paikar tu ho na mayus-e-did dam-bhar
hon laakh parde ruḳh-e-hasin par tiri nazar bhi nazar hai pyare
hain tere ash.ar ‘arsh’ aise rumuz hon zindagi ke jaise
tujhe na den log daad kaise baḌa hi tu nukta-var hai pyare
Leave a Reply