tuut jaane men khilaunon ki tarah hota hai
aadmi ishq men bachchon ki tarah hota hai
is liye mujh ko pasand aata hai sahra ka sukut
is ka nashsha tiri baton ki tarah hota hai
ham jise ishq men dete hain khuda ka mansab
pahle pahle hamen logon ki tarah hota hai
jis se banna ho taalluq vahi zalim pahle
ghair hota hai na apnon ki tarah hota hai
chandni-rat men sadkon pe qadam mat rakhna
shahr jaage hue nagon ki tarah hota hai
bas yahi dekhne ko jagte hain shahr ke log
asman kab tiri ankhon ki tarah hota hai
us se kahna ki vo savan men na ghar se nikle
hafiza ishq ka sanpon ki tarah hota hai
us ki ankhon men umad aate hain aansu ‘tabish’
vo juda chahne valon ki tarah hota hai
Leave a Reply