ah-e-zindan men jo ki charḳh pe avaz ga.i
par ga.e par na miri ḳhvahish-e-parvaz ga.i
yaad itna hai mire lab pe fughan aa.i thi
phir ḳhuda jaane kahan dil ki ye avaz ga.i
main ne anjam se pahle na palaT kar dekha
duur tak saath mire manzil-e-aghaz ga.i
maut jis raah men ghabra ke qadam rakhti thi
zindagi apni vahan bhi ba-sad andaz ga.i
par bhi baazu ke the mazbut aza.em puḳhta
phir bhi bekar miri koshish-e-parvaz ga.i
dekhte dekhte ḳhamosh hua naghma-e-dil
taar jab TuuT ga.e saaz ki avaz ga.i
ai ‘falak’ main jo gaya su-e-falak shor hua
mahfil-e-dahr se ik hasti-e-mumtaz ga.i
Leave a Reply