Aajizi Aaj Hai Mumkin Hai Na Ho Kal Mujh Mein

ajizi aaj hai mumkin hai na ho kal mujh men

is tarah aib nikalo na musalsal mujh men

zindagi hai miri thahra hua paani jaise

ek kankar se bhi ho jaati hai halchal mujh men

main ba-zahir to huun ik zarra zamin par lekin

apne hone ka hai ehsas mukammal mujh men

aaj bhi hai tiri ankhon men tapish sahra ki

karvaten leta hai ab bhi koi badal mujh men

jo andheron men mere saath chala bachpan se

ab vo taara bhi kahin ho gaya ojhal mujh men

khvahishen aa ke lipat jaati hain sanpon ki tarah

jab mahakta hai tiri yaad ka sandal mujh men

ab vo aaya to bhatak jaega rasta ‘nusrat’

ab ghana ho gaya tanhai ka jangal mujh men

Leave a Comment