naza.a meñ ab mire jiine kī duā karte haiñ
merī jaan aap pe qurbān ye kyā karte haiñ
kaisī dil-gīr hai rūdād-e-mohabbat ai dost
ham kahā karte haiñ aur log sunā karte haiñ
mai-parastī koī bid.at nahīñ ham to ai shaiḳh
sunnat-e-‘hāfiz’-o-‘ḳhayyām’ adā karte haiñ
jaur-e-mahbūb kā hotā ho kahīñ zikr to ham
ban ke anjān tavajjoh se sunā karte haiñ
marg-e-bīmār-e-mohabbat to koī baat nahīñ
aap ko rashk-e-masīhā bhī kahā karte haiñ