jo maze aaj tire gham ke azabon men mile
aisi lazzat kahan saaqi ki sharabon men mile
saari duniya se nahin un ko hai parda lekin
vo mile jab bhi mile mujh ko naqabon men mile
teri ḳhushbu se mo.attar hai zamana saara
kaise mumkin hai vo ḳhushbu bhi gulabon men mile
zindagani men nasihat nahin kaam aati hai
dars-e-aḳhlaq faqat mujh ko kitabon men mile
main ne phulon se bhi nazuk se savalat kiye
mujh ko patthar se hi alfaz javabon men mile
pyaar ke baab men ab naam kahan hai tera
koi tahrir-e-vafa kaise nisabon men mile
kya pata kal jo baḌi shaan men gum tha ‘azam’
ab vahi shaḳhs tujhe ḳhana-ḳharabon men mile
Leave a Reply