faza malul thi main ne faza se kuchh na kaha
hava men dhuul thi main ne hava se kuchh na kaha
yahi ḳhayal ki barse to ḳhud baras jaa.e
so umr-bhar kisi kaali ghaTa se kuchh na kaha
hazar ḳhvab the ankhon men lala-zaron ke
mili saḌak pe to bad-e-saba se kuchh na kaha
vo raston ko sajate rahe unhon ne kabhi
gharon men nachne vaali bala se kuchh na kaha
vo lamha jaise ḳhuda ke baghair biit gaya
use guzar ke main ne ḳhuda se kuchh na kaha
shabon men tujh se rahi meri guftugu kya kya
dinon men chand tire naqsh-e-pa se kuchh na kaha
Leave a Reply