Hasan Abbasi
ghar se mera rishta bhi kitna raha
umr bhar ik kone men baiTha raha
apne honTon par zaban ko pher kar
ansuon ke za.iqe chakhta raha
vo bhi mujh ko dekh kar jiita tha aur
main bhi us ki aankh men zinda raha
nisbaten thiin ret se kuchh is qadar
badalon ke shahr men pyasa raha
shahr men sailab ka tha shor kal
aur main tah-ḳhane men soya raha
kha rahi thi aag jab kamra ‘hasan’
main bas ik tasvir se chimTa raha
Leave a Reply