ham ḳhak-ba-sar gard-e-safar DhunD rahe hain
aur log samajhte hain ki ghar DhunD rahe hain
divanon ke manind mare shahr ke sab log
dastar ke qabil koi sar DhunD rahe hain
ab shaam hai to shahr men gaanv ke parinde
rahne ke liye koi shajar DhunD rahe hain
jo dil ke nihan-ḳhanon men rahta hai hamesha
ye log use aaj kidhar DhunD rahe hain
galiyon men jo phirte hain ye manus se chehre
Dhalti hui tahzib ke ghar DhunD rahe hain
afsurda se chehron pe baḌi der se ham log
ik khoya hua dast-e-hunar DhunD rahe hain
Leave a Reply