har ek lamha-e-maujud intizar men tha
main agle pal ki tarah vaqt ke ghubar men tha
har ik ufuq pe musalsal tulua hota hua
main aftab ke manind rahguzar men tha
ḳhud apne aap men uljha hua tha mera vajud
main chaak chaak gareban ke taar taar men tha
jo us ki ḳhush-suḳhani tak rasa.i chahti thi
mira vajud bhi lafzon ki is qatar men tha
bil-aḳhir aa hi ga.i iḳhtilaf ki saa.at
main janta huun tu is pal ke intizar men tha
Leave a Reply